Wednesday, April 22, 2009

လွတ်မြောက်ရေး လက်မှတ်ပေါင်း ၃ သိန်းကျော် ရပြီ

မြင့်မောင်
ဗုဒ္ဓဟူးနေ့၊ ဧပြီလ 22 2009 17:17 - မြန်မာစံတော်ချိန်
ချင်းမိုင် (မဇ္ဈိမ)။ ။ မြန်မာ့ဒီမိုကရေစီ ခေါင်းဆောင် ဒေါ်အောင်ဆန်းစုကြည် အပါအဝင် နိုင်ငံရေး အကျဉ်းသားများ လွတ်မြောက်ရေးအတွက် ဆန္ဒပြုလက်မှတ်များ ကောက်ခံနေရာ ယနေ့အချိန်ထိ ၃ သိန်းကျော် ရရှိထားပြီ ဖြစ်သည်။

မြန်မာအတိုက်အခံ အဖွဲ့အစည်းများက ပြီးခဲ့သည့် မတ်လ ၁၃ ရက်နေ့မှ စတင်ကာ ရက် ၄ဝ ခန့်အကြာ ကောက်ခံလာရာ ယနေ့အချိန်တွင် အဆိုပါ အရေအတွက် ရရှိထားခြင်း ဖြစ်သည်။
“လက်ဝယ် ရထားတာက ၂၅၃၅၂၄။ ဂျပန်တို့၊ သြစတြေးလျားတို့၊ နယ်စပ်ဒေသတွေမှာ ကောက်နေတာတွေ ရှိတယ်။ ကျနော်တို့ နောက်ဆုံး သိရသလောက် ၆ သောင်း၊ ၇ သောင်းလောက် ရမယ်ထင်တယ်။ လက်ထဲတော့ မရောက်သေးဘူး။ အကုန်လုံးပေါင်းလိုက်ရင် ၃ သိန်းကျော် ရပြီလို့ ပြောလို့ ရပါတယ်” ဟု ထိုင်းနိုင်ငံအခြေစိုက် နိုင်ငံရေးအကျဉ်းသားများ ကူညီစောင့်ရှောက်ရေး အသင်း (မြန်မာနိုင်ငံ) – AAPP အထွေထွေ အတွင်းရေးမှူး ဦးတိတ်နိုင်က မဇ္ဈိမကို ပြောသည်။
ယခုလှုပ်ရှားမှုကို AAPP နှင့်အတူ Forum for Democracy in Burma – FDB က ကမကထ ပြုခဲ့ပြီး၊ မြန်မာတိုင်းရင်းသား အင်အားစုများ၊ ကျောင်းသားလူငယ်များနှင့် အမျိုးသမီး အဖွဲ့အစည်းများ အပါအဝင် နိုင်ငံပေါင်း ၃၂ နိုင်ငံရှိ လူထုအခြေပြု အဖွဲ့အစည်းပေါင်း ၂၃ဝ ကျော်က ပူးပေါင်းပါဝင် ကောက်ခံနေခြင်း ဖြစ်သည်။
မေလ ၂၃ ရက်နေ့အထိ ၇၃ ရက်အကြာ ကောက်ခံမည်ဖြစ်ရာ၊ လက်မှတ်ပေါင်း ၈၈၈၈၈၈ ရရှိရန် ရည်ရွယ်ထားသည်။ ဆန္ဒပြုလက်မှတ် ကောက်ခံခြင်းနှင့်အတူ ဓာတ်ပုံနှင့် သရုပ်ပြပွဲ၊ စကားဝိုင်းများ ပြုလုပ်လာခဲ့သည်။
ဓာတ်ပုံပြပွဲတွင် နိုင်ငံရေး အကျဉ်းသားများနှင့် အကျဉ်းထောင်များ၏ ဓာတ်ပုံများ၊ နိုင်ငံရေး အကျဉ်းသားများ၏ နောက်ခံ သမိုင်းကြောင်း၊ ပြစ်ဒဏ်ချမှတ်ခံရသည့် နှစ်အရေအတွက်နှင့် ထောင်တွင်း၌ နေထိုင်ရသည့် ပုံစံများကို ပြသထားသည်။
မည်သည့်တိုင်းပြည်က လက်မှတ်မည်မျှ ရရှိကြောင်း ကြေညာသွားမည်ဖြစ်ကာ၊ ကုလ အထွေထွေ အတွင်းရေးမှူးချုပ် ဘန်ကီမွန်းထံ အခမ်းအနားတရပ် ကျင်းပ၍ ပေးပို့သွားမည် ဖြစ်သည်။
''မြန်မာ့အရေးကို စိတ်ဝင်စားတယ်၊ မြန်မာ့ဒီမိုကရေစီရေး ဖြစ်ပေါ်တိုးတက်မှုအပေါ် အတော် စိတ်ဝင်စားတယ်လို့ ပြောလို့ ရပါတယ်။ သူတို့ရဲ့ ပူးပေါင်းပါဝင်မှုက တော်တော် ကြီးထွားလာတယ်လို့ ပြောလို့ရပါတယ်။ ပြီးခဲ့သည့် နှစ်ကဆိုရင် ကမ္ဘာ့ခေါင်းဆောင်တွေကနေပြီးတော့ တောင်းဆိုခဲ့တာတွေ ရှိပါတယ်။ ဒီကြားထဲမှာ ကုလသမဂ္ဂ၊ နိုဘယ်လ်ဆုရှင်တွေ၊ အမေရိကန် ကွန်ဂယက်အမတ် အမျိုးသမီးတွေကနေ တောင်းဆိုခဲ့တာတွေလည်း ရှိခဲ့တယ်'' ဟု ဦးတိတ်နိုင်က ဆိုသည်။
သူက ဆက်ပြီး ''နိုင်ငံခေါင်းဆောင်တွေတင်မကဘဲ ကမ္ဘာ့မိသားစု အလွှာအသီးသီးမှာ ဝိုင်းဝန်းတောင်းဆိုတဲ့ ကွန်ယက်ကို ပြချင်သခြင်းဖြစ်တယ်'' ဟု ပြောသည်။
မဇ္ဈိမ

0 comments: