ပဲခူးတွင်လည်း လုံခြုံရေးတင်းကျပ်

ကိုစိုး | သြဂုတ် ၇၊ ၂၀၀၈
ပဲခူးမြို့တွင် ရှစ်လေးလုံးအထိမ်းအမှတ် အနှစ် ၂၀ ပြည့် လှုပ်ရှားမှုများ မပြုလုပ်နိုင်ရန် ယခု တပတ်အတွင်း လုံခြုံရေးများ တင်းကျပ်လျက်ရှိပြီး အနီရောင်ဝတ်ဆင်ခြင်းနှင့် အနီရောင်ဆေးများ အသုံးမပြုနိုင်ရန်လည်း အာဏာပိုင်များက ပိတ်ပင် ထားကြောင်း သိရသည်။

ပဲခူးမြို့ရှိ ဆေးဆိုင်များကို ဆေးဘူး အနီများ၊ မှုတ်ဆေး အနီများ မရောင်းရန်၊ အထည်ဆိုင်များကိုလည်း အင်္ကျီ အနီရောင် များ၊ ဦးထုပ် အနီများမရောင်းရန်၊ အထူးသဖြင့် လူငယ်များကိုမရောင်းချရန်နှင့် ကျောင်းများ၊ ဌာနဆိုင်ရာ ၀န်ထမ်းများကို လည်း အနီရောင် မ၀တ်ဆင်ရန် သက်ဆိုင်ရာ အာဏာပိုင်များက ပိတ်ပင် ညွှန်ကြားထားသည်ဟု ပဲခူးမြို့ခံ အမျိုးသမီး တဦးက ပြောသည်။
“ပဲခူးမှာ ၈၈ ခုနှစ် သြဂုတ် ၆ ရက်က သွေးစွန်းတဲ့နေ့ မို့လို့ အဲဒီအထိမ်းအမှတ် အနေနဲ့ သက်ဆိုင်ရာက ကျောင်းတွေ၊ ဌာန ဆိုင်ရာ ၀န်ထမ်းတွေကို အနီရောင် မ၀တ်ရဘူးလို့ ညွှန်ကြားထားတယ်”ဟု ၎င်းက ဧရာဝတီသို့ ပြော ဆို သည်။
ရှစ်လေးလုံး အရေးတော်ပုံအတွင်း ပဲခူးမြို့ အထက်တန်းကျောင်း အမှတ်(၃)၊ အမျိုးသားကျောင်းရှေ့တွင် သွေးစွန်းခဲ့သော သြဂုတ်လ ၆ ရက်နေ့ကို အဓိကထား၍ အာဏာပိုင်များက တင်းကျပ် ပိတ်ပင်ခြင်းဖြစ်သည်ဟု ပဲခူးမြို့က ရှစ်လေးလုံး အရေးတော်ပုံကို သိမီ လိုက်သည့် ကျောင်းသား လူငယ်တဦးကလည်း ပြောသည်။
“အထူးသဖြင့် ကျောင်းသားတွေကိုပစ်သတ်ခဲ့တဲ့နေရာ၊ အမှတ် (၃) ကျောင်းရှေ့မှာ၊ အဲဒီနေရာမှာ သွေးစွန်းတဲ့ကျောက်တိုင် ဆိုတာ ရှိတယ်၊ အခု အဲဒီကျောက်တိုင်ကို ဖျက်ပစ်လိုက်ပြီးတော့ ဟင်္သာ ရုပ်တု ၂ ခုလုပ်ထားတယ်၊ အဲဒီနေရာမှာ ပန်းခြင်း တွေ ဘာတွေချမှာစိုးလို့၊ အဓိကက အဲဒီနေရာပေါ့”ဟု ၎င်းက ပြောပြသည်။
ပဲခူးမြို့၌ လွန်ခဲ့သော ၃-၄ ရက်က စတင်၍ ကျောင်းသားများက ရှစ်လေးလုံးနှင့်သက်ဆိုင်သည့် စာများ ကပ်ခြင်း၊ ရေးသား ခြင်းများ ပြုလုပ်မည်ကို စိုးရိမ်၍ လုံခြုံရေး ပိုမိုတင်းကျပ်လိုက်ပြီး ရဲ၊ အက်စ်ဘီ ၊ စရဖ စသည့် အဖွဲ့များ ကို တမြို့လုံးတွင် နေ့ ည လုံခြုံရေး ချထားကြောင်းနှင့် ဖောက်ခွဲရေးသမား ၄ ဦး နှင့် ပတ်သက်သည့် ကြေညာချက် တခုကိုလည်း ထုတ်ပြန် ထားကြောင်း သိရသည်။
အဆိုပါဖောက်ခွဲရေးသမား ၄ ဦးဖြစ်သည့် မောင်ကိုနိုင်(ခ) ကိုကိုနိုင်၊ အေမီကျော်(ခ) အေစမီကျော်၊ ကျော်သီဟ၊ ကိုသက်ထွန်းတို့အား အမှုပေါ်သည်အထိ စုံစမ်းပြီး ဖမ်းပေးနိုင်ခဲ့ပါလျှင် မြန်မာနိုင်ငံ ရဲတပ်ဖွဲ့က ဆုငွေ အဖြစ် ကျပ် ၂၅ သိန်း ပေးမည်ဖြစ်ကြောင်း ပဲခူးဘူတာတွင် ကပ်ထားသည့် ယင်းကြေညာချက်ကို ဖတ်ရှုခဲ့ရသူ တဦးက ပြောသည်။
“အဲဒါ ကပ်တာ ၃-၄ ရက်လောက်ပဲ ရှိဦးမယ်၊ ပဲခူးမြို့မ ဈေးကြီး အ၀င်တို့ ဘူတာတို့ စတဲ့ လူစည်ကားတဲ့ နေရာ တော်တော် များများမှာ ကပ်ထားတယ်၊ ဖောက်ခွဲရေး သမား ၄ ဦးဆိုပြီး ဓာတ်ပုံတွေနဲ့ စာတွေ ကပ်ထားတယ်၊ ဓာတ်ပုံတွေက သိပ်မထင် ရှားပါဘူး၊ ခဲပန်းချီပုံကို ကော်ပီကူးထားတာ”ဟု အထက်ပါ ကြေညာချက် ဖတ်ရှုခဲ့ရသူက ဆိုသည်။
ယခုလဆန်းကတည်းကပင် ရန်ကုန်အခြေစိုက် မျိုးဆက်သစ် လူငယ်များ အစည်းအရုံးက ဒီမိုကရေစီနှင့် လွတ်လပ်ခွင့် အတွက် အသက်ပေးခဲ့ကြသော ကျောင်းသားလူငယ်များကို အသိအမှတ်ပြုစေရန် ရည်ရွယ်ပြီး ပြုလုပ်သည့် အနီရောင် လှုပ်ရှားမှုအဖြစ် ရန်ကုန်မြို့တွင်းရှိ ဆိုင်းဘုတ်များ၊ နံရံများတွင် ဆေးအနီရောင်များ သုတ်ခဲ့ကြသည်။
ရန်ကုန်ရှိ တက္ကသိုလ်များတွင်လည်း ရှစ်လေးလုံး အထိမ်းအမှတ်စာများနှင့် စစ်အစိုးရကို ဆန့်ကျင်သည့်စာများကို ကျောင်းသားများက နံရံများတွင် ကပ်ခြင်း၊ ရေးသားခြင်းများလည်း ပြုလုပ်သည်။
ရှစ်လေးလုံး အရေးတော်ပုံတွင် ပါဝင်ခဲ့ဖူးသူများကမူ အနှစ် ၂၀ ပြည့်သည့် ယခုလ ၈ ရက်နေ့တွင် ၀မ်းနည်းသည့် အထိမ်း အမှတ်အနေနှင့် အနက်ရောင် ၀တ်ဆင်ခြင်းပြုလုပ်မည်ဖြစ်ကြောင်းလည်း သိရသည်။
လွန်ခဲ့သည့် ၂ ပတ်ကျော်ကပင် ရန်ကုန်မြို့တွင် အာဏာပိုင်များက လုံခြုံရေး တင်းကျပ်ထားသည်။
ဧရာဝတီ