နိုင်ငံရေးအကျဉ်းသားများ လွတ်မြောက်ရေး ဆုတောင်းပွဲ ဂျပန်မှာ ကျင်းပ

သန်းထိုက်ဦး
တနင်္လာနေ့၊ ဒီဇင်ဘာလ 22 2008 17:09 - မြန်မာစံတော်ချိန်
ချင်းမိုင် (မဇ္ဈိမ)။ ။ အကျယ်ချုပ် ကျခံနေရသည့် မြန်မာ့ဒီမိုကရေစီ ခေါင်းဆောင် ဒေါ်အောင်ဆန်းစုကြည်နှင့် နိုင်ငံရေး အကျဉ်းသားများ လွတ်မြောက်ရေး ဆုတောင်းပွဲတရပ်ကို ဂျပန်နိုင်ငံရောက် မြန်မာ့ဒီမိုကရေစီရေး လှုပ်ရှားသူများက ယမန်နေ့က ပြုလုပ်ခဲ့သည်။

ဆုတောင်းပွဲကို ဂျပန်နိုင်ငံ Shin Mo Akasaka မြို့နယ်ရှိ ဒိုင်ဘုစုဘုရားတွင် မွန်းလွဲ ၁ နာရီ ၂၀ မိနစ်မှ စတင်ကာ ၃ နာရီအထိ မူစလင်၊ ခရစ်ယာန်၊ ဗုဒ္ဓဘာသာ ထုံးစံတို့ဖြင့် ဆုတောင်းခဲ့ကြခြင်း ဖြစ်သည်။
"ဘာသာရေးအရ ဆုတောင်းမေတ္တာပို့သတယ် ဆိုတာကလည်း ဘယ်ဘာသာမဆို မတရားတာကို တရားတာက နိုင်ရမယ်ဆိုတဲ့ ဒီ ဆုံးဖြတ်ချက်တွေနဲ့ ဒီသဘောကို ဆောင်တဲ့အနေနဲ့ ပြုလုပ်တာ ဖြစ်တယ်" ဟု ဗမာနိုင်ငံလုံးဆိုင်ရာ ကျောင်းသားသမဂ္ဂများ အဖွဲ့ချုပ် - ဗကသ (ဂျပန်) မှ နိုင်ငံခြားရေးရာ တာဝန်ခံ ကိုဖုန်းမြင့်ထွန်းက မဇ္ဈိမကို ပြောပြသည်။
ဆုတောင်းပွဲသို့ အမျိုးသား ဒီမိုကရေစီအဖွဲ့ချုပ် (လွတ်မြောက်နယ်မြေ) ဂျပန်ဌာနခွဲ အပါအ၀င် မြန်မာ့ဒီမိုကရေစီရေး လှုပ်ရှားသူ ဦးရေ ၁၀၀ ခန့် တက်ရောက်ခဲ့သည်။